Suraꞌna Paulus mange ri Ummaꞌa ri GALATIA
Suraꞌna Paulus mange ri ummaꞌa ri Galatia inni (seꞌre poropensi ri paꞌkaraengangna Roma) naukirii lantulungi tau nunipaꞌlampa-salaia ri ajarang nusala sollanna amminro tunruꞌ ri ajarang nuannabaya. Naalleangangi katojekangna nisabbuꞌ surona Isa Masihi. Nampa pole jamaangna napaꞌpokoꞌi ri tau talia Yahudi.
Suraꞌna Paulus mange ri Ummaꞌa ri EFESUS
Suraꞌna Paulus mange ri ummaꞌa ri Efesus (kota nukunni-kunnina ri tana Turki) napaꞌpokoꞌi ri paꞌtujungna Alla-taala sollanna “lampaꞌseꞌrei isseꞌ iangaseꞌ-ngaseꞌna ri seꞌre pungkaha iamintu Masihi, manna nurieꞌa ri suruga manna pole nurieꞌa ri linoa” (1.10). Ummaꞌa niareꞌ paꞌpada batang kale na Masihi niareꞌ paꞌpada ulunna, iareka paꞌpada sibatu bangungang nubatu pokoꞌna iamintu Masihi, iareka paꞌpada sitau bahine na Masihi buruꞌnenna. Paꞌpau nunapakea ri suraꞌna ampaꞌpiitteangi angkua atinna allumpai kasukkurang na pammuji mange ri Puanga.
Suraꞌna Paulus mange ri Ummaꞌa ri FILIPI
Ummaꞌ ri Filipi iami ummaꞌ bungasa napaenteng Paulus ri Eropa. Suraꞌna Paulus mange ri ummaꞌa kunjo naukirii ri hattunna nitarungku ri kota Roma. Naukirii Paulus suraꞌa inni lasukkuru mange ri ummaꞌa ri Filipi nuri tana Makedonia, seꞌre poropensi ri paꞌkaraengangna Roma. Sukkurui gara-gara paꞌdahuna nunatarimaya na langkaddorii iangaseꞌna sollanna baranii na parrang ilalangna andalleki kasukkarang. Angngukirii pole ri sesena karannuang na kasagenaang nunadahuangai Alla-taala ri tau nuꞌtallasa sipaꞌseꞌreanga Masihi.
Suraꞌna Paulus mange ri Ummaꞌa ri KOLOSE
Kolose iamintu seꞌre kota ri Asia Caddi, bageang pambuakangna kota Efesus. Suraꞌna Paulus mange ri ummaꞌa ri Kolose inni naukirii lampaꞌpauangi ajarang nuannabaya na ampekkai ajarang sala nungkuaya parallui taua tunruꞌ anggaukangi atorang sunnaꞌ na paꞌlingang. Pokoꞌ ajarang ri suraꞌa inni iamintu Isa Masihiji aꞌkulle aꞌpakasalamaꞌ na sangkaꞌ.
